邊打機邊學英文

邊打機邊學英文
一月 12, 2017 grwthhk

上星期同一班阿媽帶埋啲仔女出嚟茶敘,坐唔夠半個鐘,班細路就開始唔耐煩,周身郁、搞搞震。喺呢個時候,成班阿媽都不約而同使出殺手鐧——之唔係塞部手機或者平板電腦畀仔女囉!只要一機在手,班細路即刻變晒「木頭人」,一粒聲都冇,阿媽們亦樂得清閒、無人騷擾,可以繼續吹水。

坦白講,Mama 平日甚少畀仔女玩手機或者平板電腦,一來怕佢哋玩上癮唔願做功課,二來亦怕佢哋亂上YouTube,接觸到啲唔適合佢哋睇嘅影片,所以就算無可奈何要出動手機,Mama 亦限制佢哋只可用嚟睇卡通片。不過,最近同街坊黎太傾開,佢就完全無呢方面嘅煩惱,皆因囝囝承軒只玩一個叫「Skoolbo」嘅遊戲,已經極大滿足!

黎太話,承軒喺郭怡雅神父紀念學校讀小四,上一年,學校參加咗電子學習聯盟主辦嘅「Touch English」先導計劃,學生「攞正牌」每日返屋企「打機」玩Skoolbo,目的係提升英語能力。

承軒話好鍾意玩Skoolbo,因為有嘢學之餘,界面亦設計得好吸引,係3D 動畫,唔似得一般網上學英文嗰種界面咁老土。玩法都好似時下打機遊戲咁,有得揀人物角色,亦有好多任務要完成,同時可以喺線上同其他人一齊比賽鬥高分。

全球4.9 萬間學校玩Skoolbo Mama 即刻翻查資料, 原來Skoolbo 2010 年由澳洲一位老師Shane Hill 所創立,今日全球已經有4.9 萬間學校加入咗呢個網上學習遊戲平台。承軒玩咗4 個月,每晚大約15 分鐘,黎太察覺到阿囝嘅詞彙、聆聽方面都有進步,至少睇得明YouTube 播嘅英文片,以前佢係完全唔睇、亦聽唔明㗎。

有個咁好嘅計劃,Mama 梗係要搵電子學習聯盟主席黃岳永(Erwin)問幾句。佢話今年3 月至7 月,邀請咗4 間小學參加「Touch English」先導計劃,發現學生果然好鍾意「打機」,喺呢4 個月,平均每名學童答咗1200 條題目,等同完成咗10 本以上補充練習!最重要係見到佢哋慢慢進步,超過五成學童話無以前咁抗拒英語。

Erwin 又透露, Touch English」先導計劃結束後,隨即喺今個學年推展至全港小學,為期3 年,希望吸引到1000 個學生參與。


日期 : 20161220
報章 : 明報《Happy PaMa》教得樂周刊 P.3
版面 : Happy MaMa有話說  網頁版